Pyaar!

Kal uss ne mujhe pucha, Pyaar kya hota hai.

Pyaar !

Woh tere mere beech ki khamoshi hai,

Jo sab keh jaaye.

Woh tere mere beech ki doori hai,

Jo mujhe tere aur khareeb lekar aaye.

Tere samne aate hi, Apni ek saans lena bhool jaun,

Shayad woh Pyaar hai.

Woh ehsaas jo naam sunte hi, Din bana de,

Shayad woh Pyaar hai.

Jo mujhe majboor karti hai, Ki main bas teri un aankhon ko dekhta rahun, Shayad woh Pyaar hai.

Bhale main kitna bhi door rahun, Hamesha jo tere paas khinch le aati hai, Shayad woh Pyaar hai.

Pyaar !

Shiddat bhi hai, Junoon bhi hai,

Ehsaas bhi hai aur Sukoon bhi.

Chhupi hui Muskaan bhi hai,

Ikraar hai aur Intezaar bhi,

Inkaar hai, Armaan bhi hai.

Dard bhi hai, Dua bhi hai,

Tanhaai bhi hai, Bechaini bhi hai.

Pyaar Rooh hai, Rishta hai, Nasha hai, Khwaab hai,

Aarzu hai, Umeed hai, Tere khayalon mein likhi hui ek Nazm hai.

Aur aakhir mein bas itna kehna chahunga ki,

Pyaar woh hai jo tujhe dekh ke kahe - Pyaar tu hai.